Вучевиќ до косовците: Нема да ги земете Србите, да ги ставите во трактори и да ги испратите во централна Србија
По тензиите во северно Косово, српскиот министер за одбрана Милош Вучевиќ денеска изјави дека припадниците на вооружените сили на Србија се распоредени на позиции кон административната линија. Тој вели дека Србија нема да дозволи нова „Бура“.
„Нешто пред 14 часот, началникот на Генералштабот на вооружените сили на Србија издаде дополнителни наредби единиците на српските вооружени сили да заземат одредени позиции кои беа дефинирани во согласност со нашите одбранбени планови, стратешки планови, а исто така и оперативни и тактички акции на српските вооружени сили, се со цел да се заштити суверенитетот на Република Србија и нејзините граѓани“, изјави Вучевиќ за РТС.
Вучевиќ потврди дека Вучиќ ја потпишал наредбата за зголемување на борбената готовност и вели дека ситуацијата на Косово е драматична.
„Некој мора да разбере дека она што го прави Албин Курти нè води кон црвени линии, нè води до целосен колапс на дијалогот, нè води до деескалација на теренот“, рече Вучевиќ.
Рече дека Министерството за одбрана, односно вооружените сили на Србија, ќе ја спроведат наредбата на претседателот и ќе го направат она што се очекува, да бидат онаму каде што е најтешко, да се бранат слободата и независноста на Србија.
Министерот им порача на Србите на Косово, колку и да е ситуацијата драматична и тензична, треба да бидат максимално мирни, во смисла да не наседнуваат на провокации, да не дозволат да се игра сценарио каде би биле прикажани како некои криминални групи или хулигани, бидејќи според него, е јасно дека се врши институционален терор на територијата на Косово врз српската заедница.
„Тие сакаат да го спроведат етничкото чистење до крај, пред сè, на компактната српска заедница на северот на Косово“, рече Вучевиќ.
Mинистерот рече дека нема да се повтори 17 март 2004 година.
„Нема да ги земете преостанатите Срби и да ги ставите во трактори и да ги испратите во централна Србија. Ако тоа е целта, а според мене тоа е, мора да знаете дека Србија ќе најде адекватен одговор, пред се политички, и не исклучувам ниту еден друг одговор кој ќе биде адекватен на опасноста што и се заканува на нашата земја и на нашите граѓани, секако имајќи предвид дека го чуваме мирот речиси по секоја цена“, рече Вучевиќ.
Тој рече дека Белград е во постојана комуникација со КФОР и меѓународните посредници и дека врши политички и дипломатски притисок сите да се вразумат.
Во северно Косово денеска се судрија граѓаните со полицијата. Градоначалниците од албанска националност стапуваат на функција.
фото Фејсбук Милош Вучевиќ
