Вториот круг на претседателски заедно со парламентарните избори?!
Следната недела работните групи ќе остварат нова средба за да се договорат за датумот за одржување на претседателски и парламентарни избори. Иако опозицијата неколку пати досега бараше предвремени, власта не прифати и го повторуваше ставот дека ќе има на пролет редовни избори за Собрание.
Според информации на 4NEWS.mk во април ќе се одржи првиот круг од претседателските избори, а на вториот круг ќе има заедно претседателски и парламентарни избори.
Доколку над 800 илјади граѓани не излезат да гласаат за претседател, тогаш државата ќе ја води претседателот на Собранието Талат Џафери. Често пати досега методологијата за избор на претседател беше дискутирана, а меѓу останатите предлози беше и изборот на претседател во Собрание.
Претседателот на ВМРО ДПМНЕ Христијан Мицкоски ќе биде носител на кандидатската листа во изборната единица 1. За другите единици, не ги открива адутите.
Во СДСМ се свесни за ветувањето кон ДУИ за премиер – Албанец во техничката Влада на 100 дена пред избори. Мошне е веројатно тоа да биде Албанец кој не е член на ДУИ. Мистерот Фатмир Битиќи од редовите на СДСМ не би одбил ваква понуда.
Спикерот Талат Џафери им даде рок да се договорат до Нова Година. Потоа, најави дека самиот ќе преземе одговорност и ќе ги распише изборите согласно Уставот и Изборниот законик.
