Врховен суд ќе го разгледува предметот според кој Телеком треба да плати 4 милиони оштета на човек фирма
Предметот во кој Апелација пресуди Телеком да плати 4 милиони евра оштета на фирмата „Фокуснет“ од Штип, ќе го разгледува и Врховниот суд. Предметот е веќе поднесен и во следниот период, согласно редовната динамика на работа на ова судско тело, се очекува истиот да биде разгледан и Врховен да донесе одлука. За истиот предмет предистражна постапка отвори и Основното јавно обвинителство. Откако беше донесена пресуда на Апелација според која Телеком треба да плати 4 милиони евра оштета, Владата како акционер во компанијата беше информирана за случајот и за начинот на кој била донесена оваа одлука.
На неодамнешниот брифинг со новинарите во Обвинителството за предметот беше истакнато дека истиот е заведен во републичкото јавно обвинителство по допис од Министерството за транспорт и врски. Дополнително прибавен е извештај од Судскиот совет бидејќи имало претставка. Предметот е во фаза во која е донесена мерка со која е спречено да настанат штетни последици, истакнаа од Обвинителството.
Се очекува постапката да добие и разрешница во Републичкиот судски совет, кој вчера избра нови членови, судиите Данка Ристова и Аритон Ала. Имено, Републичкиот судски совет веќе констатираше низа незаконитости во постапката меѓу кои и дека бил потпишан записник и пресуда без да се видат списите за предметот, како и дека пресудата на Апелација со која се преиначува првостепената одлука, била донесена без одржување на јавна расправа, што е спротивно на Законот за парнична постапка. Покрај претставките од Телеком, претставка за овој случај поднесе и претседателката на Апелација Мери Дика Георгиевска.
Фирмата во чија корист пресуди Апелација имала склучено договор со Телеком во периодот од 2001 до 2002 година. Договорот бил раскинат од Телеком поради неплаќање на обврските од страна на фирмата. Потоа започна долг судски спор пред првостепениот Граѓански суд во Скопје, кој минатата година пресудил во корист на Телеком, бидејќи судот утврдил дека се работи за фирма со еден вработен, која повеќе години била со блокирана сметка, а е повторно активирана непосредно по донесувањето на пресудата на Апелациониот суд. Фирмата не дала ниту доказ за број на претплатници, инвестиции и слично. Во дописот до Владата од страна на Телеком се укажува и на тоа дека во пресудата се споменуваат документи на Телеком кои воопшто не биле дел од постапката, а дел од правниот тим на штипската фирма е и лице кое до 2015 година работело во Телеком во секторот за правни работи.
Во медиумите реагираше и „Фокуснет“. Според нив, сите инстанци, со исклучок на Основниот граѓански суд Скопје, и сите вештачења покажале дека во 2002 година компанијата била истисната од пазарот на интернет провајдери благодарение на монополската позиција на Македонски Телеком што било основ тие да покренат судска постапка која трае повеќе од 20 години.
