Вработените во Филхармонија на протест пред Влада
Денеска во 12:30 часот, вработените во Македонската филхамонија ќе одржат нов протест пред Владата , бидејќи се уште нема решение, ниту интерес од државата за решавање на проблемот кој настана со носењето на одлуката просторно да се смести уште една институција во концертната сала која е изградена за Филхармонија.
„Вработените во Македонска филхамонија не протестираат против џез оркестарот, како што одредени новинари и поединци сакаат да ја извртат вистината во последниве три месеци. Вработените во Филхармонија протестираат бидејќи не дозволуваат во нивниот простор, зграда, објект наменски изграден да ги задоволи потребите на единствениот симфониски оркестар во земјата да биде сместена уште една институција.
Нашата борба да си го зачуваме работниот простор кој го добивме по 77 години постанарски живот во објекти кои не го биравме ние, туку одевме каде што ќе ни сугерира државата и никогаш не се побунивме поради тоа – продожува и нема да запре! Со ист жар и посветеност ќе се бориме и против лажните вести кои редовно и оркестрирано се пласираат во јавноста со една единствена цела – да се извртат вистината, аргументите и фактите кои се на наша страна.
А фактите говорат дека: Објектот е изграден да ги задоволи потребите на единствениот симфониски оркестар во земјата. Тоа е првичната и единствена намена на концертната сала на Филхармонија. Тоа што некој сега сака насилно да ја изврти намената на овој објект е симптоматично и само по себе зборува дека некој заткулисно сака да истера свои лични интинтереси.
Нашата држава досега не покажа интерес за решавање на проблемот, и со тоа потврди дека нема интерес ниту за култура, ниту за традиција, ниту за трајни историски вредности. Она што загрижува е и фактот дека некои медиуми без тронка совест и одговорност ги погазија основните принципи на новинарскиот кодекс. Заборавија дека треба бидат „коректив“ на власта, и објективно да ги презентираат проблемите на граѓаните во јавноста. Наместо објективност, некои медиуми и поединци, преку ширење лажни вести и дезинформации отворено и без тронка одговорност поттикнуваа говор на омраза кон нашата институција. Наместо да бидат коректив, некои новинари, за жал, станаа огледало на нашата држава.
Личните интереси, непрофесионалноста, неукоста и бесрамноста се принципи по кои се водат нашите политичари кои немаат интерес да ги решат клучните проблеми со кои се соочуваат граѓаните. Културата секако не е приорет, кога ќе се спореди со животно загрозувачките проблеми кои ги мачат граѓаните, но, тоа не значи дека со неподнослива леснотија треба да се избрише традицијата создавана со децении. Затоа, нашата борба нема да запре, се до конечната промена на штетната одлука која ја донесе Владата“.
