Вонреден инспекциски надзор во Болницата во Кавадарци по смртта на тригодишното дете
Во ЈЗУ Општа болница со проширена дејност – Кавадарци денеска се спроведува вонреден инспекциски надзор од страна на Државниот санитарен и здравствен инспекторат, во врска со трагичниот случај на починато тригодишно дете. Истовремено, болницата информира дека е формирана и внатрешна комисија која ќе ги испитува сите околности околу случајот.
Информацијата беше соопштена од установата откако МИА вчера побара официјален став, по реакциите на родителите на починатото дете, кои побараа истрага за евентуална лекарска грешка.
Од болницата, со соопштение до јавноста, информираат дека со голема тага ја потврдуваат смртта на детето, кое било прегледано во нивната установа, а потоа упатено кон Скопје за понатамошен третман. Детето починало на пат кон главниот град.
„Изразуваме искрено сочувство до семејството. Согласно со законската процедура, известен е надлежен јавен обвинител, издадена е наредба за обдукција со цел да се утврдат причините за смртта. Стоиме на располагање и ќе дадеме целосна поддршка на сите надлежни институции што постапуваат по случајот“, се наведува во соопштението потпишано од в.д. директорката, спец. д-р Гордана Камчева.
Формираната внатрешна комисија ќе ги анализира сите аспекти поврзани со третманот на детето, а по завршување на постапката, ќе изготви извештај кој, како што уверуваат од болницата, ќе биде споделен со јавноста транспарентно и навремено.
„Ја уверуваме јавноста дека безбедноста и здравјето на пациентите, како и транспарентноста во работењето, се наш врвен приоритет“, додаваат од болницата.
