ВО ПРИТВОР И ТОЈ ШТО ДАЛ ПОТКУП, И ТОЈ ШТО ЗЕЛ И ДВАЈЦА ПОСРЕДНИЦИ! Се расплеткува криминалот во Агенцијата за поддршка на земјоделството
По акција на Јавното обвинителство за гонење организиран криминал и корупција (ОЈО‑ГОКК), денеска е одредена мерка притвор за директорот на Агенција за финансиска поддршка во земјоделството и рурален развој, Илија Стоилев, и уште четири лица поради основано сомнение за земање поткуп и противзаконско влијание.
Специјалниот судија на претходна постапка го прифати предлогот на обвинителството и за осомничените Џ.Н.(77), А.Ф.(44), и Ф.Ф.(47) и И. С.(57) определи мерка притвор од 30 дена — поради опасност од бегство, влијание врз сведоци и можност за повторување на делото. За петтата осомничена, Ј.К.(35), определен ѝ е куќен притвор. Против овие решенија странките имаат право на жалба пред Кривичниот совет.
Инспекцијата и истражителите од ОЈО‑ГОКК и Министерството за внатрешни работи вчера извршија претреси на повеќе локации. Стоилев е уапсен „на дело“ во акција за која имало пријава дека апликант понудил и дал мито за да му биде доделен договор преку програмата ИПАРД.
Според обвинението, првосомничениот – управител на правно лице – во периодот од крајот на февруари годинава до вчера повеќе пати му ветил подарок или парични средства од значителна вредност на директорот на Агенцијата за земјоделство. Останатите осомничени, меѓу кои даночен референт во УЈП Скопје и државен службеник во Министерството за земјоделство, го искористиле своето влијание и службената положба за да го поттикнат директорот да потпише договор за финансиска поддршка, иако правното лице не ги исполнувало условите од јавниот повик бр. 01/24. Директорот, по ветеното мито од 50.000 евра, потпишал договор и примил 400 евра, кои беа пронајдени при претрес.
Јавното обвинителство, оценувајќи дека се исполнети условите за одредување притвор, ги достави сите релевантни податоци до судот при Основниот кривичен суд, кој денеска донесе одлука.
.
