Во Мексико е отворена изложба на која модерната уметност им е достапна на кучињата
Кучињата и нивниот посебен однос со луѓето ги инспирирале уметниците илјадници години. Сега музејот Тамајо во главниот град на Мексико подготви изложба на дела од современа уметност кои се наменети и за луѓето и за нивните крзнени пријатели, пренесува Ројтерс.
Кустосот Лоренца Ерасти објасни дека изложбата е избор на дела од колекцијата на музејот и е дизајнирана да им овозможи на кучињата и нивните сопственици да можат заедно да ги истражуваат делата.
„Разбирањето на изложбата се заснова на емоции“, рече таа и додаде: „Приврзаноста што постои помеѓу сопственикот и нивното куче е секогаш тука, и затоа му даваме изложбен простор“.
Втората изложба #ArteyPerros, или „Уметност и кучиња“ опфаќа дела од Харис Епаминондас, Макс Ернст, Матијас Гериц, Пјер Јуиг, Ден Во и Марио Гарсија Торес, како и поема од Луис Фелипе Фабре.
Мила Коен, шестоодделенка која ја посети изложбата, рече дека ја цени идејата да дојде со нејзиното куче Сакура. „Сакам да го носам моето куче насекаде“, рече таа пред уметничкото дело на Макс Ернст. Други се согласија и посакаа уште такви искуства.
„Би било неверојатно доколку има повеќе вакви уметнички простори каде би можеле да поминуваме време со нашите кучиња“, вели Ману Ечеверрија, фотограф.
