„Во Македонија повеќе се мисли на ПР, отколку за суштината“, вели Ковачевски за изјавата на Мицкоски дека сме лидер во регионот
Екс премиерот Димитар Ковачевски вечерва во гостувањето во „Ноќно студио“ на 4ТВ, упати директна критика кон актуелната власт за начинот на кој се презентираат економските состојби во земјата.
Според него, тврдењата дека Македонија е регионален лидер кој им помага на соседите се само политички ПР кој ја замаглува реалната економска слика.
Тој се осврна на енергетската и прехранбената криза, појаснувајќи дека меѓусоседските односи се базираат на чист пазарен интерес, а не на подароци.
„Ние ништо немаме добиено од никого бесплатно. Сето жито што се увезуваше од Србија беше уредно платено. Србија само ја крена забраната за извоз заради нас, исто како што и ние ја кренавме забраната за извоз на масло за јадење за да може Албанија да купува од кај нас“, појасни тој.
Во однос на изјавите дека Македонија им помага на соседите со тоа што нивните граѓани точат поевтино гориво кај нас, Ковачевски вели дека тоа не е хуманитарна активност, туку економски императив.
„Мораме да разграничиме ПР од економска суштина. Странците кои точат гориво кај нас практично ни помагаат да ја направиме потребната девизна нивелација. Ние не им помагаме ним со тоа што им овозможуваме да точат, туку државата ги користи сите средства за да обезбеди прилив на девизи“, дециден е Ковачевски.
Иако истакна дека државните девизни резерви се на високо ниво и дека банкарскиот сектор е добро капитализиран благодарение на одговорната монетарна политика низ годините, Ковачевски изрази сериозна загриженост за падот на странските инвестиции. Тој посочи дека на почетокот на 2026 година, инвестициите се неколкукратно намалени, што создава дополнителен притисок врз целата економија.
