Во која тетовска компанија директорот го зголеми бројот на негови акции за 85 отсто?
Извршниот директор на „Жито Полог“ по августовската „голема преселба на инвесторите“ ја презеде раководната позиција во тетовската компанија и за четири месеци стекна 1,33 отсто од сите акции со право на глас
Сашо Босилков, извршниот директор на тетовски „Жито Полог“ го зголеми за 85 отсто бројот на акциите што ги поседува во таа прехранбена индсутрија, потврди Македонската берза.
Имено Босилков докупи 343 акции со право на глас во „Жито Полог“ и сега вкупниот број на акции што ги поседува во таа компанија учествува со 1,33 отсто во сите акции со право на глас.
Со оглед на последната пазарна цена на акцијата на „Жито Полог“ која изнесувала 3.000 денари, Босилков платил околу 17.000 евра.
Според расположливите податоци Босилков во „Жито Полог“ оди од позицијата менаџер за продажба во големата приватна млекарница „Здравје“ од Радово. Таму поминал повеќе од пет години. Претходно од 1993 година па до 2018 година Босилков работел на различни позиции во „Орка спорт“.
Првите акции во „Жито Полог“ Босилков ги купил во август годинава и станува збор за 403 акции со право на глас.
Претходното негово искуство со „Жито Полог“ е како неизвршен член на Одборот на директори на таа компанија.
Најголеми акционери во „Жито Полог“ се здравствената компанија „Нефроплус“ која поседува 24,98 отсто исто како и Тони Јосифовски.
Трет најголем акционер е „Лид комуникешјнс“ маркетинг компанија од Скопје која поседува 12,51 отсто од акциите. Следува Ненад Јосифовиќ со 12,47 отсто од акците.
Вреди да се истакне дека во сопствен откуп „Жито Полог“ чува 20,6 отсто од гласачките права. Тоа значи дека тие 20,6 отсто од сите акции се стерилизирани и немаат право на глас ниту носат право на дивиденда.
Директорот Босилков поседува 1,33 отсто од акциите, а околу 3 отсто од акциите поседуваат 26 домашни физички лица.
