Во Еквадор киднапиран почесен конзул на Велика Британија
Почесниот конзул на Велика Британија во пристанишниот град Гвајакил во Еквадор, Колин Армстронг (Колин) е киднапиран во југозападниот дел на земјата, соопшти денеска локалната полиција.
Дипломатот, кој исто така е земјоделец, бил киднапиран рано утринава од неговата фарма во кантонот Баба во провинцијата Лос Риос.
Полицијата соопшти дека истрагата е во тек, а британската амбасада и британските власти се уште немаат коментар.
Во последниве години, Еквадор стана центар на операции на странски и локални нарко картели кои наметнуваат режим на терор преку убиства, киднапирања и изнуда.
Сместено меѓу Колумбија и Перу, најголемите светски производители на кокаин, Еквадор заплени рекордна количина од 210 тони дрога на своја територија во 2021 година.
