ВО БУГАРИЈА СЕ ВОДИ ПОСЛЕДНАТА ТОТАЛИТАРНА КОМУНИСТИЧКА ПОЛИТИКА ВО ЕУ Негирањето и потсмевот против Македонците мора да престанат, порачува Стојков
Денес во демократска Бугарија постоењето на Македонците останува негирано, рече Стојко Стојков од ОМО Илинден Пирин, на 18-тата сесија на Форумот за малцински прашања на Обединетите Нации што се одржа во Женева. На форумот учествуваше и лидерот на единствената македонска партија во Албанија, Македонска алијанса за европска интеграција (МАЕИ), Васил Стерјовски.
– Јас сум Стојко Стојков, Македонец од македонското малцинство во Бугарија, кое денес се бори за основно признавање на своето постоење. Откако официјално бевме признати како малцинство во Бугарија и уживавме некои права, подоцна бевме прогласени за непостоечки, прогонувани како предавници и асимилирани под комунистичкиот режим. Денес во демократска Бугарија нашето постоење останува негирано, а тоа е политика утврдена со две парламентарни декларации и една одлука на Уставниот суд – рече Стојков во своето обраќање.
Ова, додаде Стојков, резултираше со стотици судски одлуки кои секое тврдење дека македонското малцинство постои го толкуваат како закана за нацијата, државата и за безбедноста.
Поради тоа, не постои регистрирана партија или организација на македонското малцинство, без оглед на 14 пресуди во Европскиот суд за човекови права против Бугарија, потенцира Стојков.
– Самото наше постоење го крши официјалниот наратив и се дочекува во медиумите и во општеството со говор на омраза, што ги прикажува Македонците како национални предавници, странски агенти и непријатели, морални дегенерици и ретардирани. Таквиот говор е нормализиран и никогаш не се казнува – вели Стојков.
Сетето ова го исклучува малцинството од општествениот и од политичкиот живот, кое не може да се претставува себеси, ниту некоја друга партија се осмелува да се залага за правата на Македонците, нагласи Стојков.
– Македонците денес немаат никакви малцински права во Бугарија, а државата отфрла секаков обид за дијалог со нив, и покрај сите препораки на институциите за човекови права. Бидејќи Европската Унија ги остави малцинските права на милост и немилост на националните држави, тоа де факто се претвори во европски благослов за оваа политика на негирање, асимилација и дискриминација кон едно малцинство во рамките на ЕУ – кажа Стојков.
Според него „оваа политика создаде конфликт со Македонија и ја блокира нејзината евроинтеграција, загрозувајќи ја регионалната безбедност”.
– Оваа политика придонесува за создавање индустрија за корупција од милијарда евра со трговија со бугарски државјанства. Оваа политика против Македонците денес е последната тоталитарна комунистичка политика во Европската Унија и мора да престане – порача Стојков, пренесува весникот „Илинден“.
.
