ВМРО-ДПМНЕ: ЈО да истражи како Левица купила имот во центарот на Скопје по трипати пониска цена
Членот на Централниот комитет на ВМРО-ДПМНЕ, Валентин Манасиевски, денеска на прес-конференција упати сериозни обвинувања кон лидерот на Левица, Димитар Апасиев, и неговата партија, прашувајќи како дошло до тоа тие да се стекнат со деловен простор во центарот на Скопје, чија пазарна вредност, според Манасиевски, изнесува околу 1 милион евра, за сума од само 300 илјади евра.
„Јавното обвинителство треба да отвори истрага – дали има договор под маса, дали банката и извршителот анимирале доволен број заинтересирани купувачи, и зошто граѓаните кои редовно плаќаат кредити не добиле можност да лицитираат за истиот објект“, рече Манасиевски.
Според него, Апасиев, кој често критикувал банки и извршители, сега „со нивна помош“ дошол до значаен имот под пазарната цена.
„Толку од аскетизмот и фолирањето – Левица е целосно демаскирана“, порача Манасиевски, додавајќи дека „она што илјадници Македонци не можат да си го дозволат, Апасиев го направи без двоумење“.
Од Левица сè уште нема официјална реакција на овие обвинувања.
