ВМРО-ДПМНЕ ЌЕ ФОРМИРА МИНИСТЕРСТВО ЗА ЕНЕРГЕТИКА – Божиновска: Во него ќе работат сериозни кадри, ќе се ревидира сѐ што е досега направено (ВИДЕО)
Во програмата на ВМРО-ДПМНЕ е наведено дека ќе биде формирано министерство за енергетика. Во него ќе бидат вработени стручни кадри кои ќе се занимаваат сериозно со оваа проблематика, ќе направат стратегија, но и ревидирање на се што е досега направено во таа област.
„Да почнеме да се стремиме кон тоа Македонија веќе да не биде увозник на електрична енергија, за почеток сами да си ги задоволиме потребите за електрична енергија“, истакна членот на Извршниот комитет на ВМРО-ДПМНЕ, Сања Божиновска на денешната трибина „Енергетска платформа за иднина во Битола“ на тема „Концепт за инвестиции во енергетиката”.
Според неа, на Македонија и е потребна базна енергија, а треба и да се балансира системот.
„Енергетика е нешто што се планира, не е нешто што се прави од денес за утре ниту за неколку месеци, туку тоа е потребно долгорочно да се планира, што значи дека треба да се направи стратегија. Од тука тој збор стратегија е добро искористен од претходната Влада, но само на хартија. Во јануари 2020-та година беше донесе закон за стратешки инвестиции. За мало населено место треба да е 50 милиони евра инвестиција, за голем град над 100 милиони евра инвестиција и треба да донесе многу бенефиции за животот на граѓаните да се зголеми извозот и економски бенефити”, кажа Божиновска.
Истакна дека згора на се, за грчката централа, Македонија од свои пари, што значи од граѓаните, треба да и даде неповратни 50 милиони евра, и тоа не е заем туку и дава 50 милиони евра што значи дека сите се овие странски компании имаат неверојатни бенефиции.
„Досега има најавени 11 такви стратешки инвестиции, и еве ние веќе сме два месеци пред избори, но ниедна стратешка инвестиција не е донесена. Зошто? Секој ден последните две недели слушаме за последните 4 стратешки инвестиции како тие се добри за Македонија, како ќе имаме почист воздух во Скопје и останато, меѓутоа што е важно? Сите овие инвестиции добиваат невидени бенефиции, прво земјиштето го добиваат за 0,1 евро и го добиваат на 25 до 30 години”, посочи Божиновска.
