ВЛЕН му одговори на Ахмети: Улицата не е за милионери што бегаат од правда!
Коалицијата ВЛЕН остро реагира на најавите на лидерот на ДУИ, Али Ахмети, дека доколку поранешниот министер Крешник Бектеши се најде на обвинителна клупа за трагедијата во Кочани, партијата ќе излезе на улица.
„Дваесет години на власт – никогаш на улица за народот, секогаш во тишина за правдата“, реагира ВЛЕН, оценувајќи дека улицата не му припаѓа на „милионерите кои се плашат од одговорност“, туку на народот кој бара неселективна правда.
Во реакцијата, коалицијата го прашува Ахмети каде бил кога Албанците, како што велат, се соочувале со монтирани процеси, како „Монструм“, „Сопот“, случаите во Бродец и Диво Насеље, кога наводно без вина биле затворани, осудувани или исчезнувани.
„Ахмети никогаш не излезе на улица за својот народ, но сега, кога се загрозени неговите блиски од милионските тендери – одеднаш се сети на улицата“, стои во реакцијата.
ВЛЕН ги обвинува ДУИ и СДСМ за заеднички обиди за одвраќање на правдата, повикувајќи ги граѓаните да не потпаѓаат на „страхувањата кои партијата на Ахмети намерно ги шири“. Според нив, единственото нешто што го плаши ДУИ е „вистинската правда и гласот на народот на избори“.
„Нема враќање назад. Народот се разбуди. И овој пат – ни улицата нема да го спаси Али Ахмети“, порачуваат од ВЛЕН.
