Владата на САД ќе им плаќа на илегалните мигранти да ја напуштат земјата
Американското Министерство за домашна безбедност денеска соопшти дека финансиски ќе ги помага и награди илегалните мигранти кои ќе ги напуштат САД и ќе се вратат во својата земја.
Покрај финансиската и патната помош за самодепортирање од САД, за која портпаролот на министерството потврди дека вклучува бесплатен билет во еден правец, дополнителни 1.000 долари ќе им бидат исплатени и на лицата кои ќе потврдат дека се вратиле во нивната матична земја, објави Ројтерс.
Министерството наведува дека најмалку еден илегален имигрант веќе ја искористил оваа понуда и се вратил во Хондурас, додавајќи дека се резервирани уште неколку авионски билети за оваа и следната недела.
По победата на претседателските избори, Доналд Трамп вети дека ќе депортира милиони илегални имигранти од САД, потсетува Ројтерс.
