(ВИДЕО) Црнoгорецот кој избрка муслиманско семејство во Бар: Од хигиенски причини, облечените лица не смеат да пливаат во базенот
Човекот кој избрка муслиманско семејство од плажа во Црна Гора, објасни како се случил инцидентот.
Баран Драган Ѓуровиќ изјави дека ќе поднесе кривична пријава против лицето кое, како што посочува, го монтирало и објавило на социјалните мрежи видеото на кое разговарал со семејството на малолетната И.А. која пливала со облека на „Роки Бич“ во Бар.
Ова видео крена голема бура на социјалните мрежи, бидејќи се смета дека Ѓуровиќ намерно не дозволува капење во буркини.
Државните обвинители во Основното државно обвинителство во Бар и Вишото државно обвинителство во Подгорица оценија дека дејствијата на сопственикот на приватната плажа во Бар немаат елементи на какво било кривично дело за кое гонењето се презема по службена должност, пренесе порталот РТЦГ.
Ѓуровиќ за порталот Приморски изјави дека на базенот Роки Бич во Утјеха не е дозволено да се плива во облека, а тоа е истакнато на таблата пред базенот. Ѓуровиќ додаде дека во морето можат да пливаат во бурка, хиџаб, но не и во базен.
„Секој што живее во Бар знае кој е Медо Ѓуровиќ. Цел живот живеам со муслимани, имам пријатели муслимани. Во мојата компанија 80 отсто од вработените се муслимани. Со децении повеќето од моите гости беа муслимани. Работам со муслимани повеќе од 20 години и никогаш не сме имале ниту една расправа. Меѓу моите гости на кои им пречеше девојката која се капеше во бурка беа муслимани. Правилата се исти за сите. Од хигиенски причини, облечените лица не смеат да пливаат во базенот“, изјави Ѓуровиќ за Приморски портал.
Полицијата го повикала човекот и тој дал изјава за настанот. Избрканото семејство го пријавило Ѓуровиќ. Оние кои го објавија видеото прашуваат дали на овој начин ќе го дочекуваат муслиманите во Црна Гора на одмор.
