Веспрем го преслуша европскиот првак, триумф за Митревски со Порто

Митревски најголемиот дел од мечот го мина на клупата, главно затоа што неговиот колега, Диого Рема Маркеш имаше добар настап, со 10 одбрани. Македонскиот чувар на мрежата не успеа да запише интервенција. Порто имаше проблематично прво полувреме, во кое константно губеше, дури и со четири разлика, за на одмор да замине со 11-13.

Во второто полувреме успеа да направи пресврт токму со гранитната одбрана, но предводени и од Кристенсен и Оливеира во нападот со по пет гола. Кај Висла, Крајевски броеше до пет гола.

Во исто време, актуелниот европски шампион капитулираше на домашен терен во мечот со Веспрем и тоа релативно убедливо, со 28-33. Интернацоналниот тим на Унгарците уште рано го презеде водството и наметна темпо, кое Магдебург не успеа да го следи, протегајќи го своето водство до највисоки плус шест, во вториот дел. Фабрегас и Касадо со по шест гола беа најефикасни, а Дамгард постигна толку кај бундеслигашот.