Венко Филипче го номинира Александар Трајановски за нов потпретседател на СДСМ
Кандидатот за градоначалник на скопската општина Аеродром на изминатите локални избори, Александар Трајановски, ќе биде назначен за нов потпретседател на Социјалдемократскиот сојуз (СДСМ). Ова на денешната прес-конференција го соопшти лидерот на партијата, Венко Филипче, коментирајќи ги најавените промени во раководството по изборните резултати.
„На потпретседателската позиција ќе го номинирам д-р Александар Трајановски, во моментот член на Извршниот одбор“, изјави Филипче.
Лидерот на СДСМ истакна дека Трајановски е „исклучително посветен на партијата“ и дека имал одлична кампања на локалните избори со која привлeкол многу внимание.
„Сметам дека ова ќе биде значајно кадровско зајакнување на ова ниво на партијата“, кажа тој.
Александар Трајановски е специјалист ортопед и трауматолог. Тој е поранешен директор на Универзитетската клиника за трауматологија, ортопедски болести, анестезија и реанимација и интензивно лекување и Ургентен центар (ТОАРИЛУЦ). Досега ја извршуваше функцијата член на Извршниот одбор на СДСМ.
Оваа промена во раководството доаѓа откако по вториот изборен круг од локалните избори, една од потпретседателите на СДСМ, Ана Чупеска, поднесе оставка.
