Снопче обвинува: Владата и ДИК намерно ги одлагаат изборите за јануари, за да не гласа дијаспората
Пратеникот на Алијансата за Албанците, Халил Снопче, денеска реагираше по објавувањето на конечните изборни резултати од Државната изборна комисија (ДИК), обвинувајќи дека роковите за повторените избори во четири општини се толкуваат погрешно, со цел да се изигра дијаспората.
Снопче нагласи дека законскиот рок од 60 дена за одржување на изборите во Гостивар, Врапчиште, Маврово-Ростуше и Жупа започнал да тече од 29 октомври, а не од денот на последното објавување на резултатите. Поради тоа, тој бара изборите да се одржат најдоцна до крајот на декември.
„Потребно е да се направи разлика меѓу заклучокот за објавување на конечните изборни резултати и оној за завршување на изборите. Законот е јасен – рокот од 60 дена се смета од денот на објавување на конечните резултати, што во овој случај е 29 октомври. Затоа изборите треба да се одржат до крајот на декември“, истакна Снопче.
Тој изрази сомневање дека одложувањето на објавувањето на резултатите од ДИК било „намерно и координирано со владата“, со цел да се избегне периодот кога иселениците се во татковината за празниците.
„Ова одложување изгледа намерно. Со овој рок е очигледно дека целта е изборите да се одржат на 11 јануари, само неколку дена откако иселениците ќе се вратат во земјите каде што живеат и работат“, рече Снопче.
Тој направи споредба со 2021 година, кога, според него, ДИК ја известила владата само шест дена по завршувањето на првиот круг, без да го чека вториот.
Снопче упати директен апел до претседателот на Собранието, Африм Гаши, да покаже независност и да ја закаже датата на изборите пред Нова година.
„Господин Гаши, покажете величина – закажете ги изборите пред Нова година и да не ги разочараме повторно иселениците. Во ваши раце е да ја покажеме вистинската сила на дијаспората во овие четири општини“, изјави тој.
Пратеникот на Алијансата за Албанците посочи и правна дилема во врска со член 132 од Изборниот закон, тврдејќи дека повторувањето на изборите треба да се одвива со истите кандидати, а не со нови.
„Доколку се дозволи пријавување на нови кандидати, процесот ќе стане нееднаков и практично невозможно е да се организира во рок од 60 дена. Само повторувањето со истите кандидати има правна и административна логика“, изјави Снопче.
