Ванделт: Нова година, нова германска инвестиција
Антје Ванделт, директорката на германската комора во Македонија, со допис до медиумите го честиташе почетокот на изградбата на логистичко-дистрибутивниот центар на „Лидл“ во близина на Куманово и на граѓаните им порача дека германскиот синџир на маркети сега е поблиску до почетокот на долгоочекуваната продажба.
„Минатата недела имав чест да присуствувам на поставувањето на камен темелник на новата инвестиција на германскиот синџир на маркети „Лидл“ во Северна Македонија. Лидл започна со подготовки за изградба на центар за логистика и дистрибуција во индустриската зона „Речица“ во близина на Куманово. Според компанијата, логистичко-дистрибутивниот центар ќе биде со големина од околу 200.000 квадратни метри. Инвестицијата изнесува околу 80 милиони евра и само во овој сегмент од работењето ќе бидат отворени над 150 нови работни места.
Лидл е првиот германски синџир кој започнува со работа во земјата. Сите со голема возбуда чекаме Лидл да ги отвори вратите во Северна Македонија. Но треба уште малку да почекаме, важно е дека еден одлучувачки чекор во оваа насока беше направен минатата недела“, порача Ванделт.