Утре се полага државна матура – Јаневска: Креативноста насочете ја кон успех, не кон препишување – фатените ризикуваат година пауза и без диплома
Министерката за образование Весна Јаневска денеска истакна дека утре започнува полагањето на државната матура и се е подготвено за успешен почеток и реализација на процесот.
Таа упати апел до учесниците:
„Набљудувачите, тестаторите и директорите на училиштата да бидат на висина на задачата и да придонесат за објективност на целиот процес. Да не дозволиме да се повторуваат непријатни ситуации и нерегуларности кои ги гледавме во минатото. Правната регулатива е затегната и секој сноси одговорност. Учениците да си ја сфатат сериозно обврската. Верувам дека го повториле материјалот кој е веќе совладан и соодветно на тоа, нема треба од иновативни обиди за изигрување на системот и правилата. Знам дека дел од нив поседуваат голема креативност, но таа да се искористи за нешто друго, наместо непотребно да се ризикува. Верувам никој не сака негативни последици. Фатен препишувач, си го стопира времето за цела една година, да не може да полага и да ја добие дипломата од која му зависи понатамошна едукација или вработување. Среќно на сите!“, вели Јаневска
