Утре се гласа за новата Влада, опозицијата ја нарекува „пазар 3“ коалиција
Собранието утре ќе одржи седница за реконструкција на Владата. Ќе се избираат новите министри на Алијансата за Албанците, а ќе се разрешат министрите од редовите на Алтернатива.
Кадрите на АА кои се предложени се Кренар Лога за Министер за правда, Фатмир Меџити за здравство, Азир Алиу – Министер за информатичко општество и администрација, а Министер за животна средина и просторно планирање ќе биде Каја Шукова од СДСМ. АА добива и две заменик-министерски функции. Тирон Јајага, заменик министер за одбрана и Вјолца Бериша, заменик министер за земјоделство.
Собраниската регулатива за разрешување на министри предвидува седница на која времето за дискусија не е ограничено.
За македонската опозициска ВМРО-ДПМНЕ, новата коалиција меѓу АА и Владата е „Пазар3“коалицијата. Оваа партија инсистира на предвремени парламентарни избори како единствено решение за политичкиот хаос.
Од друга страна, од СДСМ и денеска преку соопштение велат дека обезбедиле мнозинство кое ќе унапреди многу важни процеси за државата.
„Зголеменото мнозинство овозможува да продолжи енергетската транзиција, економските иницијативи како Отворен Балкан, регионалната соработка, поголема поддршка за стратешкото партнерство со САД и унапредувањето на добрососедските односи.“, велат од СДСМ.
Новиот владин состав ќе го поддржи независниот пратеник Скендер Реџепи. ТВ21 го праша Реџепи дали ќе бара дополнителен ресор во Владата во замена за неговата поддршка, бидејќи Владата не предложила разрешување на заменик министерот за култура Даим Лучи, кој важи за близок на Реџепи.
„Јас имав и имам неколку забелешки за Владата, но моите забелешки ќе ги кажам во наредниот период, а врз основа на околностите ќе дебатирам и за мојата позиција и владејачка одговорност во рамките на мнозинството.“, рече Скендер Реџепи.
Се очекува утре „Огнената група“ да не гласа за новата Влада. Такво нешто се очекува и од пратеникот на мнозинството, Павле Трајанов.
