УДАР ЗА РУСКИТЕ ЈУТЈУБ БЛОГЕРИ: Гугл ги укинува рекламите и монетизацијата во Русија
Гугл ги укинува рекламите и монетизацијата во Русија, вклучително и за руските Јутјуб блогери.
Услугата на Гугл за контекстуално рекламирање AdSense ги прекинува своите операции на рускиот интернет и ќе ги деактивира сметките на руските корисници, соопштија денеска од Гул.
Ова е поврзано со цензурата на видео платформата Јутјуб во оваа држава што властите ја најавија по почетокот на руската инвазија на Украина. Јутјуб е во сопственост на Гугл.
„Ќе ги деактивираме сите AdSense сметки со Русија како нивна локација. Ова значи дека ќе биде невозможно да се заработува од монетизација преку такви сметки“, се вели во изјавата на тимот на Google Payments.
Руските корисници на Јутјуб минатата недела се пожалија дека услугата за хостирање во нивната земја е целосно исклучена.
Многу руски блогери снимаа видео за тоа како санкциите влијаат на нивната земја. Оние кои ја напуштија земјата и заминаа во други држави, снимаа видеа за нивниот живот во Грузија, Ерменија, Казахстан и слично.
