Уапсен е маж кој планирал бомбашки напад на џамија во БиХ
Во Босна и Херцеговина (БиХ) е уапсен терорист кој планирал бомбашки напад на џамија.
Обвинителството денеска потврди дека во земјата е уапсен маж поврзан со терористичката организација Исламска држава кој планирал да изврши терористички напад на територијата на земјата. Се работи за 42-годишниот Мирза Капиќ од градот Зеница, кој претходно е осуден за кривични дела поврзани со тероризам и бил на боиштата во странство.
Капиќ е уапсен на крајот на јули од страна на припадниците на Државната агенција за истраги и заштита (SIPA). Oбвинет e дека користел апликации за комуникација за да контактира со луѓе кои поддржуваат радикални движења и помагачи на Исламската држава минатиот месец.
Во преписката која ја пресретнала полицијата, тој потврдил дека планирал напад со експлозив врз џамија во Босна и Херцеговина во јули. Не е наведено во кое место Капиќ го планирал нападот. Од лицата со кои контактирал барал упатство за изработка на експлозивна направа со детонатор.
Сакал да ги нападне проповедниците на Исламската заедница во БиХ кои објавуваат прогласи против исламските радикали и кои, како што рекол, ги пријавуваат поддржувачите на радикалните движења и на Исламската држава во полициските агенции во БиХ. При апсењето полицијата ја одземала електронската опрема што ја користел Капиќ и на неа сега се врши дополнително вештачење. Тој е осомничен за кривично дело тероризам. Голем број босански државјани војуваа во Сирија.
