Турски државјанин заглавен меѓу с. Ново Коњарево и ГП со Бугарија, се јавил на 112!
Центарот за управување со кризи (ЦУК) информира дека во последното деноноќие имало вкупно 2.169 повици на Единствениот број за итни случаи 112, од коишто „реални“ повици биле 36,42%, а 63,58% биле за други потреби на граѓаните што не биле итни. Кон Полиција биле упатени 57,85%, кон Итната медицинска помош 31,42%, а кон пожарникарите 9,20% од реалните повици кон 112 во ЦУК. Збирот повици што биле за комбинирано решавање од „реалните“ повици во ЦУК, 1,53% со другите 63,58% што се именувани како „неитни повици“, биле вкупно 1.383 на број и биле предмет на примање, на обработка во ЦУК, а и на директно координирање за нивно решавање со други институции од Системот за управување со кризи, согласно природата на пријавените итни случаи.
По добиен повик на 112 за заглавен турски државјанин во предел меѓу с. Ново Коњарево и граничниот премин со Бугарија, Регионалниот ЦУК Струмица веднаш остварил комуникација со СВР Струмица, по што Гранична полиција Ново Село излегла на терен и го пронашла лицето, коешто живо и здраво безбедно е извлечено од теренот.
Инаку, пожари на шуми и вегетација на отворено според извештаите на Регионалните центри за управување со кризи во државата се уште има, така што и во последното деноноќие имало десетина пријавени за запалена нискостеблеста шума и друга вегетација, а пожарникарите гаснеле и отпадоци, ѓубришта и запалени контејнери на отворено на територијата на државата.
ЦУК апелира за да не се палат стрништа, шума и друга вегетација, а и отпадоци, ѓубришта и контејнери на отворено, бидејќи тоа го намалува квалитетот на амбиенталниот воздух и граѓаните да ги слушаат препораките на пожарникарите преку медиумите за превенција од пожари.
Истовремено, ЦУК потсетува и за внимателност при прошетките во нашата прекрасна природа, на повисоките места и планините во нашата држава, бидејќи при зимски услови на места со снег и мраз е лизгаво, особено на осоите на почетокот и на крајот од денот.
