Турција воведе казни за патници кои стануваат од седиште пред да застане авионот
Патниците што патуваат кон или низ Турција и ги откопчуваат безбедносните појаси или стануваат од седиштето пред целосно да застане авионот, отсега ќе се соочуваат со парични казни, согласно новата регулатива на Турската управа за цивилно воздухопловство.
Законот, кој стапи на сила на почетокот на мај, е воведен со цел зголемување на безбедноста при слетување. Како што информираат турските власти, при контроли и инспекции било утврдено дека голем број патници не го почитуваат правилото за останување во седиште сè до целосен престанок на движењето на авионот, па дури и отвораат багаж пред дозвола од екипажот.
Иако регулативата не ја наведува точната сума на казната, турската телевизија Халк ТВ објави дека изнесува 2.603 турски лири, односно околу 60 евра.
Казна ќе може да се изрече и на патници кои по исклучување на знакот за појас брзаат кон излезот, без да ги почекаат патниците од редовите пред нив. Авиокомпаниите кои нема да обезбедат спроведување на овие правила, исто така може да бидат санкционирани.
Туркиш ерлајнс веќе ги информираше своите стјуардеси и персонал за новите обврски и процедури, јавуваат турските медиуми.
