Три причини зошто Ким Џонг-ун и Владимир Путин сакаат да станат пријатели

Севернокорејскиот лидер Ким Џонг-ун денеска ја напушти Русија, каде помина една недела и се сретна со претседателот Владимир Путин. Двете нации можат да бидат корисни еден за друг, и имаат голем број заеднички интереси и проблеми, од заеднички непријатели до потпирање на Кина, пишува Би-Би-Си и објаснува зошто Путин и Ким Џонг-ун сакаат да станат пријатели.

И двајцата сакаат нешто еден од друг

Прво, и двајцата сакаат нешто еден од друг. Северна Кореја може да обезбеди артилериска муниција и друго оружје што и е потребно на Русија за нејзината војна во Украина.

Што се однесува до Северна Кореја, годините затворени граници и строги санкции доведоа до сериозен недостиг на храна, гориво и пари. Азиската земја, исто така, може да побара од Русија чувствителна технологија за подобрување на своето нуклеарно оружје.

Тие имаат заеднички непријател

Второ, тие имаат заеднички непријател – Западот и Соединетите Американски Држави. И Русија и Северна Кореја се под меѓународни санкции, и двете се соочуваат со одреден степен на меѓународна изолација. Во случајот на Русија, војната против Украина ја забрза оваа ситуација, но сето тоа започна уште порано. Инцидентите како труењето во Солсбери, кога Русија се обиде со отров да го убие поранешниот агент Сергеј Скрипал, кој почна да соработува со британските служби, предизвикаа реакција на Западот.

Откако пропаднаа преговорите меѓу тогашниот американски претседател Доналд Трамп и Ким Џонг-ун во 2019 година, Северна Кореја е практично отфрлена од меѓународната заедница. Севернокорејците со вознемиреност гледаа како САД ја зајакнуваат соработката со Јужна Кореја и го прошируваат своето воено присуство во Азија.

Кина

Причина број три – Кина. Поради меѓународните санкции Русија е се позависна од Кина. Дали звучи познато? Северна Кореја, исто така, се повеќе се потпира на Кина и не е особено среќна поради таа зависност. Секогаш е добро да имаш повеќе од еден пријател.

Без разлика дали ќе се постигне договор за испорака на оружје, Русија преку преговори со Северна Кореја им испраќа порака на САД дека Москва сама ќе ги избере пријателите и дека никој не може да влијае на тоа. Од друга страна, Пјонгјанг јасно испраќа предупредување до Јужна Кореја да не се приближува премногу до САД.