Трајковски порача дека никој не е над законот: Издадени 20 казни, не се почитувала одлуката за замрзнување на цените!
Од донесувањето на првата Одлука – за ограничување на маржата од пет до десет отсто до сега се извршени над 1 800 надзори и издадени се над 20 прекршочни платни налози во вредност од 2,5 милиони денари, соопшти директорот на Државниот пазарен инспекторат, Горан Трајковски.
Како што рече Трајковски денеска на прес-конференција, ДПИ неселективно постапува по сите владини одлуки.
-И натаму ќе работиме со полн капацитет и сите инспектори ќе бидат на терен. Никој не е над законот, тоа ќе биде така додека сум јас директор на Инспекторатот. Секој што прекршил одлука или закон ќе биде санкциониран, а казните се високи, од 800 – 10 000 евра зависно од големината на субјектите, истакна Трајковски.
Тој се обрати откако претходно министерот за економија Крешник Бектшеи соопшти дека од 5 април се замрзнуваат цените на 11 видови овошје и зеленчук.
