Томески: Не се познати причините за пожарот во Универзална, дополнително ќе се утврдуваат
Командирот на скопската Бригада за противпожарна заштита Звонко Томески во изјава за медиумите посочи дека уште не се познати причините за пожарот што ја зафати Универзалната сала.
Тој додава дека причините дополнително ќе ги утврди полициската екипа, а додаде и дека нема повредени затоа што во моментот немало градежни работи.
Според него, пожарот за кратко време бил ставен под контрола иако имале висока температура во самиот објект.
Интервенирале девет противпожарни возила и 24 пожарникари.
„Во 9 часот и 50 минути пријавена е дојава за настанат пожар во Универзална сала. Веднаш беа испратени две противпожарни возила од блискиот потцентар во населбата Тафталиџе коишто уште при доаѓањето забележаа висок столб од чад и веднаш побараа дополнителна помош. За релативно кратко време и благодарение на пожртвуваноста на колегите пожарот беше ставен под контрола иако имавме висока температура во самиот објект. Би сакал да се заблагодарам и на полициските службеници кои ни овозможија побрзо да пристигнеме, како и на јавните претпријатија „Комунална хигиена“ и „Водовод“ кои се потрудија континуирано да не снабдуваат со вода за да интервенцијата биде што е можно поуспешна“, вели Томески.
На терен имало имало густ чад, а температурата била многу висока и на соседните објекти кои се во непосредна близина.
„Штетата не можеме да ја констатираме сега. Не знаеме што се имало внатре, бидејќи настана колапс на кровната конструкција се уште се работи на догасување, има висока температура се уште во објектот, не може да се пристапи до сите места. Она што е битно за нас, интервенцијата е успешна од аспект на брзина на интервенирање и тоа што нема повредени пожарникари и граѓани“, порача Томески.
Томески упати и апел до властите за што е можно поскоро да се одобри вработување на нови пожарникари.
„Нашата единица функционира со пополнетост со 40 отсто што е недеволно. Во пресрет на летна сезона навистина не знаеме како ќе се одвиваат работите, но ни се потребни нови пожарникари што е можно побрзо да можеме да бидеме поекипирани и да можеме да одговориме на сите побарувања од нас“, додаде Томески.
