Тирана се крена на нозе – протестираат за ослободување на косовските полицајци
Во Албанија има протест за ослободување на косовските полицајци кои беа уапсени деновиве во централна Србија и завршија во притвор. Албанците од Тирана протестираа за нивно ослободување.
Под мотото „Вчера, денес, утре, засекогаш заедно“ синоќа по 19 часот група граѓани одржаа протест пред владата во Тирана.
Насобраните граѓани носеа знамиња на Албанија, Косово и на ЕУ, пееја традиционални албански песни, носеа плакати со натпис „сакаме обединета нација“ и извикуваа „Митровица е Албанија“ и „да ги ослободиме нашите браќа“.
„Бараме Албанците да бидат добро каде и да живеат, како на пример во Косово, Македонија. Состојбата на север нè погоди, на Албанците таму не им е добро. Сакаме државата да заземе став за поддршка на косовските Албанци. Како Албанец, чувствувам дека Албанците треба да бидат добро каде и да живеат. Мора да останат обединети, дури и во Митровица, да се борат против неформалноста што е таму“, рекол еден од демонстрантите за АТА.
Oбвинителството во Краљево им одреди притвор на уапсените припадници на косовската полиција Р.З., Б.С. и М.Ш. Пред три дена српската полиција ги лоцираше и ги уапси.
Тие се бранеле со изговор дека береле печурки.
Властите во Белград велат дека тие се уапсени длабоко на територијата на централна Србија, а Приштина тврди дека се „киднапирани“ на територијата на Косово. По инцидентот, Владата на Косово одлучи да го забрани увозот на стоки од Србија. Косовскиот премиер Аљбин Курти побара итно ослободување на тројца косовски полицајци. ЕУ повика на деескалација на Косово.
