Светозар Јаневски му продаде на Мишковиќ вино и ракија за 9 милиони евра
Најголемата винарска визба „Тиквеш“, минатата година му продала алкохолни пијалоци во вредност од 530,6 милиони денари, или за околу 8,6 милиони милиони евра на Делта ДМД Доо Белград, фирма-ќерка на Делта Холдинг, една од најголемите компании во Србија.
Ова е изнесено како новопласирана информација во ревидираниот консолидиран извештај на ВВ Тиквеш објавен на „Македонска берза“. Делта ДМД Доо Белград е означен како најголем клиент на македонскиот произведувач и единствен кој што му носи над 10 отсто од приходите. Продажбата кон оваа компанија за трговија со брендови изнесува 24,86 отсто во вкупните приходи на ВВ Тиквеш.
Произведувачот од Кавадарци лани продал флаширано вино и ракија во вредност од 36,25 милиони евра, што е подобар резултат за 5 милиони евра во однос на една година претходно. Приходите во 2022 од продажба биле значително подобрени на сите три пазари на „Тиквеш“ – македонскиот, српскиот и тој во Југоисточна Европа.
Добивката е 3,15 милиони евра, односно за безмалку цел милион подобра од една година претходно, а тоа е остварено со попусти и дисконти дадени за клиентите во вредност од дури 555 милиони денари (околу 9 милиони евра), покажува извештајот.
„Делта“ е холдинг од повеќе бизниси во сопственост на Мирослав Мишковиќ, милијардер кој долго време важеше за најбогат Србин. Можеби најбогатиот човек во регионов неодамна започна огромен проект кој ќе го носи името Ананас, а ќе биде пандан на Амазон и најголемата онлајн платформа на Балканот. Ананас е проект кој ќе чини 100 милиони евра. Делта Холдинг важи за една од најголемите компании која во последните 30 години има вкупен приход од 24 милјарди евра.
Јаневски како доминантен сопственик, во идниот период ќе ја раководи и менаџира винарската визба „Тиквеш“ се до изборот на нов генерален директор на компанијата. Оваа одлука ја донесе Управниот одбор на винарската визба во јуни откако директорската позиција по неколку години ја напушти Радош Вукиќевиќ.
А.К.
