Ќе се реши проблемот со паркирањето во Клиничкиот центар „Мајка Тереза“
На денешната 149. седница, Владата на Република Северна Македонија го разгледа и усвои решението за долгогодишниот проблем со паркирањето во Клиничкиот центар „Мајка Тереза“.
Со усвоената одлука, се овозможува потпишување договор меѓу Министерството за здравство и Градот Скопје.
Министерството веќе ги заврши процесите за регистрација на парцелите и изработка на елаборати, што ќе овозможи изградба на модерен паркинг, вклучително и катни гаражи, како и воведување софтверско решение за ефикасно управување.
Со оваа инвестиција, се очекува значително подобрување на условите за пациентите, здравствените работници и сите граѓани кои ги користат услугите на кампусот.
Исто така, на седницата беше усвоен Предлог-законот за Советот на Јавни Обвинители, кој заедно со предлог законот на Јавното обвинителство доби позитивно мислење од Венецијанската комисија. Со овие усвојувања, Владата ги исполнува обврските предвидени во Реформската агенда и продолжува со реализација на својата програма за обезбедување подобар, поквалитетен и побезбеден живот за граѓаните.
