Странски парламентарци велат дека ЕУ и САД водат „попустлива политика“ кон Србија, Ана Брнабиќ им одговори
Бројни парламентарци од Европа и САД бараат меѓународната заедница да го засили притисокот врз Србија. Десетици европски и американски парламентарци испратија заедничко писмо до претставниците на САД, Европа и Велика Британија во кое бараат да ја преиспитаат политиката кон Косово и Србија.
„Српскиот претседател Вучиќ води кон сѐ поголема ескалација на тензиите со Косово. Западот е воздржан во критиките – а тој пристап веќе не функционира, велат политичари задолжени за надворешни работи“, пренесува берлинскиот весник Тагесшпигел. Како што оценува весникот, ЕУ и САД водат „попустлива политика“ кон Србија од страв дека „Белград ќе се приклучи на рускиот табор“. „Владата на Вучиќ не учествува во санкциите против Москва“, пишува во текстот.
„Рускиот претседател Владимир Путин ужива симпатии меѓу српското население, додека многу Срби одбиваат полноправно членство на нивната земја во ЕУ – членство кое не е на повидок“, заклучува весникот.
Српската премиерка Ана Брнабиќ, како одговор на писмото на парламентарците од ЕУ и САД кои бараат построги мерки против Србија, одговори дека тоа е „добредојдено“ затоа што тоа е „жив доказ“ дека косовскиот премиер Албин Курти навистина „уживал целосна поддршка и охрабрување за поткопување на мирот и стабилноста на Балканот“.
Писмото го потпишаа и претседателите на комисиите за надворешна политика на парламентите на 10 држави, 56 други парламентарци од бројни земји, како и членови на Европскиот парламент, меѓу кои и претседателот на Комисијата за надворешна политика на Британскиот парламент, Алиша Кернс и претседателот на комисијата за надворешна политика на германскиот парламент, Михаел Рот.
„Избегнување на имплементација на постигнатите договори (и Договорот од Брисел со отфрлање на формирањето на Заедницата на српските општини повеќе од 10 години, и Охридскиот договор со кој се бара имплементација на Бриселскиот договор) и поткопување на основните човекови права на Србите на Косово “, напиша Брнабиќ, означувајќи го Косово со ѕвездичка како што е договорено ЕУ.
На Косово со месеци има нереди. Деновиве повторно косовските власти уапсија двајца Срби за наводни воени злосторства.
Фото EPA-EFE/ANDREJ CUKIC
