Стопен сунѓер и крв биле најдени на јакната на Андреј од ДНК
Во судскиот процес за трагичниот пожар во дивата дискотека „Пулс“, во кој животот го загубија 63 млади лица, Јавното обвинителство денеска презентираше нови наоди од увидот на местото на настанот.
Според обвинителството, во објектот биле затекнати бројни горливи изолациони материјали, меѓу кои стиропор, первол, гипс картон и дрвени елементи, кои значително придонеле за брзото ширење на пожарот.
Пред Судот беше прикажан фотоалбум составен од 92 фотографии, како дел од материјалните докази, кои детално ја прикажуваат затекнатата состојба по настанот. На фотографиите се гледа внатрешноста на опожарениот објект, поставеноста на бината, димензиите на влезовите, како и решетките на малите прозорци од тоалетите.
Обвинителството посочи дека биле пронајдени и три празни противпожарни апарати, што укажува на недоволна подготвеност за справување со пожар.
Над бината, како што беше наведено, имало метални конструкции и конзоли поставени на мала висина, при што растојанието од бината до плафонот изнесувало околу 2,7 метри.
Исто така, беше презентирана и неоштетена пиротехничка фонтана, чија техничка спецификација укажувала дека дометот на прскање бил поголем од растојанието помеѓу бината и плафонот.
Од обвинителството беше истакнато дека во објектот биле присутни ограничувачки и небезбедни услови за евакуација, меѓу кои преградна двокрилна врата, алуминиумска врата, како и странична врата без рачка, со заклучена брава, метални алки и катанец во заклучена положба, што дополнително го отежнало излегувањето на присутните.
Во записникот е наведено дека пожарот настанал како последица на употреба на пиротехнички средства од страна на групата ДНК.
Посебен дел од доказите се однесува и на внатрешните материјали во објектот. Според обвинителството, сунѓерот во клубот бил набавен непосредно пред почетокот со работа во 2012 година и бил горлив материјал кој при согорување создава жешки капки.
Според вештачењето на микротраги, вакви траги биле пронајдени и кај дел од починатите лица, меѓу кои и кај пејачот Андреја Ѓорѓиевски. На неговата јакна, како што беше наведено, биле констатирани капки крв поврзани со дејството на овој материјал.
Денешното изведување на докази следува по тензичниот почеток на рочиштето, при што одбраната ги оспори дел од вештачењата на Институтот за судска медицина и побара нивно изземање. Судот ги одби тие барања како неосновани, а доказната постапка продолжува.
