„Стопанска банка Скопје“ ќе дава двојно повеќе пари за независните членови на Надзорен одбор, колкава е наградата?

Секој независен член на Надзорниот одбор на Стопанска банка Скопје од сега па во иднина ќе добива годишна награда од 10.000 евра, а доколку биде избран за претседател на Надзорниот одбор неговата награда ќе биде 20.000 евра годишно. Независни членови се видни научници – економисти, Македонци кои не работат во банката. Вработените во банката кои се членови на Надзорен нема да добиваат дополнителни средства за овој ангажман

Стопанска банка Скопје одлучи да ги удвои годишните надоместоците за независните членови на Надзорниот одбор. Станува збор за мерка со која една од трите најголеми банки на дело покажува дека сака да ја зголеми атрактивноста на ангажанот член и претседател на Надзорен одбор.

Имено, до сега со одлука од 2012 година досега член и претседател на Надзорниот одбор на банката добивал награда од 400 евра месечно односно на годишно ниво вкупен износ од 5.000 евра. За тие пари секој член на Надзорниот одбор има сет од високосложени задачи кои се состојат од проверка и одобрување на работењето на Управниот одбор на банката и голем корпус од нивните одлуки.

Со новата одлука што акционерите на банката (поточно грчката НБГ како доминантен акционер) ја усвоија секој независен член ќе добива нето износ од 10.000 евра што е двојно повеќе од 5.000 евра колку што добиваше до сега.

Интересно е тоа што со новата одлука значајно се зголемува односно за 4 пати расте наградата што годишно би ја добивал претседател на Надзорниот одбор доколку е тој независен член (а независен значи да не работи во македонската банка ниту да биде вработен во грчката НБГ н.з.).

Во објаснувањето на предлогот на одлуката кое е достапно на следниот линк https://www.seinet.com.mk/Default.aspx?lang=MK&docID=69172 се истакнува дека по направената анализа на пазарот е утврдено дека за банката ќе биде корисно ако го зголеми износот за награди на членовите на надзорниот одбор затоа што обемот на ангажман на член или претседател на Надзорниот одбор веќе не кореспондира со надоместокот од 400 евра нето месечно.

Во актуелниот состав на Надзорниот одбор на Стопанска банка Скопје има двајца независни членови. И двајцата се истакнати професори на скопскиот државен Економски факултет при УКИМ , а тие се Сашо Ќосев и Владимир Филиповски.

Паралелно со одлуката за зголемување на надоместокот за Надзорен одбор, акционерите одлучија да го удвојат и надоместокот на независните членови на Одборот за ревизија кој исто така има обемен ангажман во оценката на деловни активности на банката со особен аспект на кредитирањето.

Досега надоместокот на членовите на Одборот на ревизија бил 2.400 евра годишно, а сега ќе биде 4.000 евра, а за претседател на Одборот доколку тој е независен член наградата би била 6.000 евра во нето износ годишно. 

Р.Ф.