СТАРИ ИЗВЕШТАИ, НОВИ ГЛАВОБОЛКИ – Водостопанство 2021 година ја завршил со загуба од половина милион евра
Големиот државен загубар водостопанство во 2021 година работел со сериозни загуби, и на крајот на годината покажал негативен финансиски резултат од близу половиина милион евра, или поточно 457 илјади евра.
Ова го покажува финансискиот извештај за Водостопанство, кое е акционерско друштво во државна сопственост, и кое своевремено беше формирано обединувајќи ги сите регионални водостопанства, со цел да се контролира нивното лошо работење и големите загуби во кои влегуваа.
Но, тоа се покажа како сосема неуспешен модел, а Водостопанство продолжи да тоне во загуби и лани, за што имаше и серија протести од вработените, на кои им се доцнеше со исплата на платите.
АД Водостопанство има обврска да ги објавува своите финансиски извештаи на Берзата, но тоа го направи со големо задоцнување, така што дури на почетокот на 2023 година се објавуваат финансиските извештаи за 2021 година.
А, според податоците од Министерството за финансии, пак, Водостопанство продолжило со загуби ни во текот на годинава, така што на крајот на вториот квартал лани неговите загуби беа на сума од околу два милиони евра.
Според информации кои веќе ги објавивме, Владата лани му префрлила на АД Водостопанство 110 милиони денари, непосредно пред Нова година. Тоа е сума од 1,8 милиони евра. Треба да се знае дека на крајот на септември ова претпријатие за наводнување веќе еднаш доби 100 милиони денари од Владата, покажува платформата „Отворени финансии“. Владата во тоа време донесе заклучок со кој ги задолжи членовите на Управниот одбор во наредните 12 месеци да ги намалат своите надоместоци за 50 отсто.
Н.Н.Ф.
