„Стани бе чедо мајкино“: Марш за ангелите во Кочани!

Со солзи, болка и тишина, денеска улиците на Кочани беа преплавени од граѓани кои се приклучија на протестниот Марш за ангелите, во знак на почит и барање за правда за младите животи изгубени во трагедијата што го потресе градот.

Маршот беше организиран од семејствата на загинатите, кои со скршени срца, но со исправени глави, повикаа на одговорност и правда. Нив им се придружија и од иницијативата „Кој е следен“.

Еден од најпотресните моменти беше кога една мајка, поминувајќи покрај зграда на која имаше залепено некролози, со треперлив глас извика: „Стани бе чедо мајкино“.

Маршот започна од Паркот на Револуцијата, а продолжи кон Трговскиот центар, општинската зграда, полициската станица, Основниот суд и Обвинителството.