ССК ќе плати казна од 1.620 евра, санкцијата е изречена од Комисијата за заштита на конкуренција
Сојузот на стопански комори на Македонија ќе плати прекршочна казна од 1.620 евра откако денеска, Комисијата за заштита на конкуренцијата утврди дека имало давање на неточни, нецелосни податоци и податоци кои можат да ја доведат во заблуда Комисијата за одлучување по прекршок.
До висината на прекршочната санкција се доаѓа откако ќе се пресметаат ланските приходи на комората, кои изнесуваат 11.432.592 денари, со процентот од 0.87 отсто, колку што утврди дека треба да изнесува казната.
При контрола на службената комуникација на овластените лица во Комората од страна на Комисијата за заштита на конкуренцијата јасно е утврдено дека истите имале активна улога во процесот на договарање и свесно давале неточни и нецелосни податоци заради избегнување на одговорноста за картелско здружување.
Во октомври годинава Комисијата за заштита на конкуренцијата, преку соопштение до медиумите, објави дека неколку синџири на маркети нелегално се договарале за усогласено делување спротивно на Законот за заштита на конкуренцијата. Од КЗК тогаш известија дека ова било констатирано по направена ненадејна контрола кај правните лица, како и дека била поведена прекршочна постапка.
