Средношколци од цела земја утре ќе ги претстават своите бизнис идеи на натпревар во М6 во Скопје
Националниот натпревар на ученички компании ќе се одржи утре во едукативниот центар М6 во Скопје, во организација на Џуниор Ачивмент Македонија. Настанот ќе трае еден ден и ќе собере средношколци од целата држава кои ќе ги претстават своите бизнис-иницијативи и претприемачки идеи.
„На натпреварот ќе учествуваат повеќе од 70 ученици распределени во 15 ученички компании, од 12 средни училишта од Берово, Битола, Богданци, Велес, Прилеп, Скопје и Струмица. Во рамките на настанот учениците предводени од одговорниот наставник имаат можност да презентираат што сработиле во текот на учебната година на штандови. Брендирани со свој штанд, име и лого на компанијата, секоја ученичка компанија ќе се обиде да ја импресионира жири комисијата со својата бизнис идеја и да се натпреварува за учество на европски натпревар кој се организира во мрежата на Џуниор Ачивмент“, наведено е во соопштението.
Како што соопштија од организацијата, главната цел на оваа програма е да им се овозможи на младите луѓе практично искуство во водење бизнис, развој на финансиска писменост, подобрување на вештини за работа и поттикнување на претприемнички дух.
„Преку тимска работа и дружење, учениците се стекнуваат со знаења и вештини кои ќе им помогнат во нивниот личен и професионален развој. Натпреварот е поддржан од Агенцијата за поддршка на претприемништвото на Република Северна Македонија и приватни бизниси, а се реализира од организацијата Џуниор Ачивмент Македонија – член на светската мрежа Junior Achievement Worldwide, основана 1919 година, денес присутна во повеќе од 120 земји. Оваа мрежа ги спроведува програмите за претприемничко образование и финансиска писменост, кои секоја година ги посетуваат повеќе од 10 милиони луѓе. Џуниор Ачивмент Македонија веќе 7 години организира ваков тип натпревари како и голем број обуки и работилници посветени на претприемничкото образование, финансиска писменост и подготвеност на младите за работа“, се додава во соопштението.
