СПАСОВСКИ ОСТАНУВА КООРДИНАТОР ВО СОБРАНИЕТО, А РЕЗОЛУЦИЈАТА НА ФИЛИПЧЕ ИСЧЕЗНА Епилог од кавгата во врвот на СДСМ
Оливер Спасовски останува координатор на пратеничката група на СДСМ во Собранието, рече денеска на прес-конференција претседателот на партијата Венко Филипче.
Тој одговори на новинарско прашање во врска со неодамнешната изјава на Спасовски дека понудил оставка од функцијата координатор на пратеничката група на СДСМ.
– Да, тоа се случи меѓу двата изборни круга, но причина за тоа беше едно недоразбирање од техничка природа, кое што го расчистивме во меѓувреме. Ја разбирам неговата реакција во однос на тоа прашање, поради тоа што тоа доведе до една таква непријатна ситуација, која што не беше ниту намерна, ниту тенденциозна. Но, како и да е, поразговаравме и по расчистувањето на тоа недоразбирање, сепак Оливер Спасовски ќе остане координатор на пратеничката група на СДСМ – истакна Филипче.
Поранешниот министер за внатрешни работи Спасовски, неодамна не зборуваше за „недоразбирања д техничка природа“, како што орезентира Филипче, туку рече дека понудил оставка во моментот кога требало да се поднесе резолуцијата до Собранието за „црвените линии“ со Бугарија. Спасовски додаде дека е точно дека барал да биде сменет од функцијата координатор поради овој предлог на партијата, затоа што бил против таков чекор.
Во документот на СДСМ се предагаше Собранието да ја заврши постапката за измена на Уставот со финално гласање најдоцна до 10 февруари 2026 година.
Оваа резолуција до денес не е доставена до Собранието за разгледување.
.
