Собранието пресече: Вработувања во здравството само со мерит-систем, камионите со електронски листови
На денешната 84. седница, Собранието ги донесе дополнувањата на Законот за здравствената заштита и законот за ратификација на Протоколот за електронски товарен лист (eCMR).
Со измените во Законот за здравствената заштита, кои беа донесени по скратена постапка, се укинува дискреционото право на директорите при вработување медицински кадар во јавните установи. Новите решенија предвидуваат изборот да се врши исклучиво врз основа на стручност и компетентност, со цел да се избере најквалитетниот кандидат, да се врати довербата во институциите и да се спречи одливот на медицински кадар од државата.
Паралелно, со ратификацијата на дополнителниот протокол кон Конвенцијата CMR (усвоен во Женева, 2008 година), се овозможува дигитализација на транспортните активности. Овој протокол воведува електронски товарен лист (eCMR), со што се олеснува размената на регулаторни информации меѓу транспортните оператори и државните органи.
Протоколот за eCMR е веќе прифатен од 39 земји, меѓу кои Германија, Франција, Велика Британија, Турција и соседните Грција и Бугарија, овозможувајќи легална употреба на дигитални испратници во меѓународниот патен транспорт.
