Собранието го продолжи рокот за бесправно изградените објекти до 2031 година

Собранието денеска го усвои продолжувањето на рокот за постапките поврзани со бесправно изградените објекти, со што граѓаните кои веќе поднеле документација ќе имаат дополнителни пет години за завршување на своите постапки. Законот за изменување на Законот за постапување со бесправно изградените објекти беше донесен по скратена постапка на 85. седница, со 67 гласови „за“, пет „против“ и без воздржани.

Со измените, рокот се продолжува до 2031 година и се однесува исклучиво на објекти изградени до 2011 година. Формално, законските измени не отвораат можност за поднесување на нови барања, туку имаат за цел довршување на постапките што веќе се водат пред општините.

Иницијативата за продолжување на рокот беше поддржана од ЗЕЛС. Во барањето доставено до Собранието и Владата, Управниот одбор на ЗЕЛС наведува дека голем дел од постапките не биле завршени поради судски спорови, наследни и имотно-правни прашања, како и други непредвидени околности. Продолжувањето на рокот има цел само да овозможи завршување на започнатите предмети, без отворање на нови постапки.

Првично, Законот за постапување со бесправно изградените објекти беше донесен во 2011 година. Со денешните измени, во членот 5 се заменуваат зборовите „петнаесет години“ со „дваесет години“, со што се продолжува времетраењето на процесот на озаконување.

Од парламентарното мнозинство нагласуваат дека станува збор за техничко продолжување, со цел да не се прекинат илјадници предмети кои се наоѓаат во разни фази на постапка.