СО ОБУКИ ЗА КОМПЈУТЕРИ, СТРАНСКИ ЈАЗИЦИ И ДЕФИЦИТАРНИ ЗАНИМАЊА ДО ПОМАЛА НЕВРАБОТЕНОСТ – предност ќе имаат младите, но и жените
Над две илјади граѓани ќе можат да аплицираат за различни типови на обуки преку Оперативниот план за вработување на невработени лица кои го најави Владата. Обуки кај конкретен работодавец, за што работниците ќе добиваат надомест од Владата, обуки за дефицитарни занимаања, но и обуки за кумпјутерски техники и странски јазици се планираат за следниот период.
– Како што ветивме продолжуваме со серија прес-конференции коишто се посветени на Оперативниот план, затоа што цениме дека нашата држава не може да оди напред само ако институциите чекорат, а луѓето стојат во место. Со Оперативниот план за вработување за 2025 година, ја менуваме парадигмата – како што веќе потенциравме, од пасивни мерки одиме кон активна поддршка, обучување и реална вклученост на пазарот на труд.
Денешен фокус е мерката обуки и од самата содржина на оваа прес-конференција ќе забележите зошто цениме дека ова е исклучително важно. Ова не се само обуки – ова се шанси. Шанси за секој кој сè уште ја чека својата прва работа, шанси за жените кои со години беа оставени надвор од системот, за младите кои бараат нов почеток и за сите кои сакаат да станат дел од нова зелена, дигитална и општествено одговорна економија – нагласи на денешната пресконференција Марија Митева, портпаролка на Владата на Македонија..
Таа истакна дека во рамки на мерката Обуки, во овој циклус предвидени се вкупно да бидат опфатени над 2.000 лица, со различни профили на поддршка согласно нивните потреби, но и пазарните реалности.
– Ќе започнам со првата обука којашто е наменета за невработени лица кои што се регистрирани во Агенцијата за вработување и оваа обука ќе биде кај конкретен работодавач, на конкретно работно место. Овде се вклучени се 245 лица.
Приоритет имаат жени, млади до 29 години и долгорочно невработени лица. Секоја личност ќе добива надоместок од 12.000 денари месечно, за време на обуката којашто е во времетраење до 3 месеци.
Втората обука се однесува за веќе побарувани занимања на пазарот на труд. Овде се опфатени 600 лица и фокусот на обуките е потврден со социјалните услуги, зелените работни места и трговијата и услугите. Исто како и во претходната и овде надоместокот ќе биде до 12.000 денари месечно – укажа Митева.
Потоа дополни дека се планираат и обуки за напредни и основни вештини, тоа се однесува на обуките коишто се за компјутерски вештини и јазични обуки и со нив ќе бидат опфатени 720 лица.
– Јас лично би сакала да ги истакнам обуките коишто се однесуваат на напредни дигитални и ИТ обуки, коишто се преку лиценцирани програми. Ќе можете од документот да видите за кои обуки, колку актуелни обуки коишто се навистина побарувани во овој период од страна на многу млади, на многу граѓани се вклучени во оваа мерка, колку се навистина истите овие и финансиски оптеретувања за младите.
Сега ќе можат да бидат опфатени и да ги искористат 470 лица, а секој учесник ќе добие меѓународно признат сертификат, што значително ќе ја зголеми неговата или нејзината конкурентност на пазарот на труд – укажа портпаролката на Владата.
