Со хуманитарна трка посветена на настраданите во Кочани ќе се одбележи Денот на Европа

Со хуманитарна трка посветена на настраданите во пожарот во кочанската дискотека „Пулс“, Делегацијата на Европската Унија и мрежата на Јуроп хаус годинава ќе го одбележат Денот на Европа. На 25 мај, во исто време во Скопје, Струмица, Крива Паланка, Битола, Велес, Струга и Тетово, ќе се трча за поддршка на Кочани.

„На трката ‘Сите за Кочани-трчаме заедно‘ може да учествува секој, без разлика на возраста или физичката подготвеност. Трките се наменети за сите односно рекреативци, спортисти, аматери, помлади и повозрасни, бидејќи не се работи за километри, туку за солидарност. На 25 мај, нема да трчаме за резултати, ниту пак за награди – ќе трчаме за солидарност и за вредностите кои нѐ дефинираат како општество и како заедница“, велат од Делегацијата на ЕУ.

Пријавувањето е веќе започнато и се одвива преку платформата https://sitezakocani.mk. Таму секој заинтересиран може да го избере градот од кој ќе трча и да стане дел од најзначајната хуманитарна трка годинава. Собраните средства од котизациите ќе бидат донирани преку Црвениот крст, кој ќе се погрижи донациите да стигнат директно до заедницата во Кочани, таму каде што помошта е најпотребна.

Во пожарот во дискотеката „Пулс“ кој се случи на 16 март, загинаа 62 лица, а речиси 200 лица беа повредени.