Снимка од „Сејф Сити“ прикажана во судница: Јовановски ѝ удирал шлаканици на Ивана неколку часа пред трагичниот настан
Со изведување на видео-снимка како доказ, денеска во судница продолжи судскиот процес против Стојанче Јовановски, кој се товари дека ја навел на самоубиство сопругата Ивана, која почина со пад од тераса заедно со нивната шестгодишна ќерка Катја.
Станува збор за снимка од системот „Сејф Сити“, на која, според Обвинителството, се гледа настан од 2 март 2026 година, околу 11 часот, односно неколку часа пред трагедијата. На видеото е забележано дека обвинетиот во краток временски период ѝ удира повеќе шлаканици на Ивана.
Според презентираните кадри, по заминувањето на сведокот Мартин Саздов со возило „БМВ“ по средба со Ивана кај гимназијата „Нова“, на местото пеш пристигнува Јовановски. Во 11:07 часот, Ивана влегува во кадарот и се среќава со него на влезот од училиштето, по што двајцата застануваат на тротоарот.
На снимката се гледа дека Јовановски вознемирено реагира, гестикулира и ја удира Ивана со десната рака во лицето, по што таа се повлекува. Расправијата продолжува, а Ивана во еден момент седнува на ограда, држејќи се за лицето. Неколку минути подоцна, таа станува и расправијата продолжува.
Во меѓувреме, на местото повторно пристигнува возилото на Саздов, кој се приклучува на разговорот. Според снимката, во 11:12 часот Јовановски повторно ѝ удира шлаканица на Ивана, по што сведокот се обидува да интервенира и застанува меѓу нив, оттурнувајќи го обвинетиот и обидувајќи се да го спречи понатамошното насилство.
И покрај обидот за смирување на ситуацијата, од видеото може да се забележи дека Јовановски продолжува со вознемирено однесување и повторно физички ја напаѓа Ивана.
