„Скопско и сè е можно“! Како скопска Пивара направи профит поголем од милијарда денари?
Пивара Скопје имаше извонредна деловна година во својата 99 година од постоењето, покажуваат податоците од финансиските извештаи достапни на веб страницата на Македонската берза за хартии од вредност.
Во своето работење во 2023 година Пивара Скопје оствари вкупни приходи од продажба од 127,9 милиони евра. Тоа е за 28 милиони евра подобар резултат од претходната 2022 година.
Доктрината на оваа голема македонска компанија која е дел од концернот на „Кока Кола“ и во минатата година го практицираше златното правило за вложување во продажбата и маркетингот. И докажа дека тоа се враќа со добро. За маркетинг и продажба лани Пивара Скопје потрошила 14,3 милиони евра што е за 2,7 милиони евра повеќе од издвоеното за таа намена во 2022 година.
Но ефектот е видлив. Нивната продажба лани во споредба со 2022 година пораснала за 27 милиони евра.
Задоволни ќе бидат и акционерите на компанијата. Нето добивката изнесува 17,56 милиони евра. Резултатот и тука е одличен со оглед на тоа дека профитот пораснал за 1,7 милиони евра во однос на претходната 2022 година.
При тоа само по овој основ Пивара Скопје на државата платила данок во вредност од 2,4 милиони евра.
Вредно за истакнување во овој краток преглед на главните парамтри од работата на Пивара Скопје е и тоа што во последните две години таа на своите акционери им исплатила дивиденда во вкупна вредност која надминува 34,5 милиони евра. Од добивката за 2022 година лани и годинава се исплатени вкупно 15,73 милиони евра, а во 2022 година, за претходната година, се исплатени 15,75 милиони евра.
Р.Ф.
