Скопскиот хотел „Солун“ ќе биде конфискуван
Хотелот „Солун“ од центарот на Скопје е меѓу севкупниот имот, заедно со деловни простории, станбени единици и други недвижни и подвижни предмети, кој ќе биде предложен од страна на обвинителството за конфискација во случајот со предметот „Феникс“.
Предметен јавен обвинител кој постапува во предметот познат во јавноста под кодно име „Феникс“ до Основниот кривичен суд – Скопје поднесе Обвинителен акт против пет лица на кои им се става на товар дека сториле продолжено кривично дело Перење пари и други приноси од кривично дело од член 273 од Кривичниот законик. Со Обвинителниот акт е поднесен и Обвинителен предлог против шест правни лица обвинети за истото кривично дело.
Најзвучното име меѓу обвинетите е поранешниот претседател на Советот на Општина Центар, Владимир Здравев.. Истрагата се однесуваше на набавката на 11 споменици меѓу кои и „Воинот на коњ“ поставен на плоштадот „Македонија“ кои биле опфатени во проектот Скопје 2014.
Неофицијално, ново во сегашното обвинение е што со него нема да бидат опфатени поранешниот премиер Никола Груевски, ниту поранешниот министер за финансии, Зоран Ставрески, поранешната министерка за култура, Елизабета Канческа – Милевска, поранешните градоначалници на општина Центар, Владимир Тодоровиќ и Виолета Аларова, бидејќи согласно последните законски измени, им застаре делото.
