Сите студенти ќе добијат ваучер од 250 евра за електронски уреди: Нов закон поднесен во Собранието
Сите студенти во Македонија, без разлика дали студираат на државен или приватен универзитет, наскоро ќе можат да добијат вредносен ваучер од 250 евра за набавка на електронски уреди. Оваа финансиска поддршка е предвидена со новиот Закон за издавање на вредносни ваучери за студентите, кој денеска беше официјално поднесен во Собранието на Република Македонија.
Со законот се предвидува сите редовни и вонредни студенти до 29 години, запишани во учебната 2025/2026 година на државни и приватни високообразовни установи, да имаат право на ваучер кој може да се искористи за набавка на персонален компјутер, лаптоп или таблет.
Вкупната вредност на ваучерите изнесува 850 милиони денари, а секој поединечен ваучер ќе биде во износ од 15.300 денари (околу 250 евра). Според законското решение, ќе се доделат вкупно 55.000 ваучери.
„Целта на овој проект е јасна – поддршка за дигитална писменост, подобри услови за студирање и еднаков пристап до технолошки алатки за сите студенти во државата“, порачаа предлагачите на законот.
Со оваа мерка се очекува да се олесни пристапот до модерна технологија и да се унапредат можностите за квалитетно образование и развој на младите луѓе во Македонија.
