Симион побара изборите во Романија да бидат поништени
Националистичкиот претседателски кандидат Георге Симион, кој го загуби вториот круг од гласањето во неделата, поднесува барање до Уставниот суд за поништување на изборите поради „надворешно мешање“.
„Официјално барам од Уставниот суд да ги поништи изборите“, напиша на својот профил на социјалните мрежи Х Симион, лидер на националистичката партија Алијанса за обединување на Романците.
„Од истите причини“ што предизвикаа поништување на изборите минатата година – „надворешно мешање“, додаде тој, истакнувајќи дека ниту Франција, ниту Молдавија, ниту кој било друг нема право да се меша во изборите на друга земја.
Претседателските избори во Романија беа повторени овој месец откако Уставниот суд го поништи минатогодишното гласање поради сомневања за руско вмешување во корист на победникот од првиот круг во ноември, крајно десничарскиот независен кандидат Калин Георгеску, и нареди целиот изборен процес да започне одново.
Вчера, француската служба за надворешно разузнавање категорично ги отфрли обвинувањата од основачот на апликацијата за пораки Телеграм, Павел Дуров, дека Париз се обидел да влијае на претседателските избори во Романија.
Дуров рече дека го одбил барањето на шефот на француската разузнавачка служба, Николас Лернер, да се забранат романските конзервативни гласови од неговата платформа пред романските избори.
Во неделата, независниот кандидат за претседател на Романија, Никусор Дан, победи на претседателските избори со 53,60% од гласовите. Неговиот противник, Георге Симион, доби поддршка од 46,40 проценти од гласачите.
