СИ ПОДНЕСЕ ОСТАВКА: Извршниот директор на Renault си заминува со гордост
Лука де Мео поднесе оставка од функцијата извршен директор на Renault, се сели во луксузниот сектор надвор од автомобилската индустрија.
Групацијата Renault бара нов извршен директор по изненадувачката одлука на Лука де Мео да ја напушти позицијата по пет успешни години на чело на францускиот бренд.
Пред да се приклучи на Renault, де Мео беше клучен во подемот на Seat во рамките на Volkswagen Group.
Тој се приклучи на Renault во јули 2020 година, кога компанијата беше во сериозна криза, забележувајќи рекордна загуба од 7,3 милијарди евра во првата половина од годината.
Сепак, де Мео успеа да започне оживување на компанијата со фокусирање на модели со повисоки маржи на профит и скратено време на развој.
Неговиот план за трансформација, наречен „Renaulution“, донесе нова стратегија и освежена гама на возила, особено во сегментот на SUV возила.
Моделот Renault 5 беше вратен во електрична верзија, а потоа Renault 4 како електричен кросовер.
Следната година, Twingo ќе се врати и како прифатлив EV модел.
Како дел од трансформацијата, брендот Dacia е исто така зајакнат, првенствено преку лансирањето на теренецот Bigster, додека во 2026 година се очекува електричен модел со ниска цена произведен во Европа, кој би можел да го замени сегашниот Spring (произведен во Кина) и да послужи како попристапна верзија на Twingo.
Значителни инвестиции се направени и во брендот Alpine, кој целосно се преориентира кон електрични модели.
Новиот „хот-хеч“ A290 веќе е претставен, како и кросоверот A390, додека наследникот на A110, спортскиот A310 со распоред на седишта 2+2 и поголемите теренски модели за северноамериканскиот пазар се очекуваат до крајот на деценијата.
Де Мео сега ја напушта автомобилската индустрија за да заземе нова позиција надвор од овој сектор.
Според Le Figaro, тој стана нов директор на француската луксузна холдинг компанија Kering, сопственик на брендови како Gucci, Balenciaga и Yves Saint Laurent.
Управниот одбор на групацијата „Рено“ веќе бара негов наследник, а де Мео ќе ја извршува функцијата до 15 јули.
Тој вели дека заминува со чувство на гордост:
„Доаѓа момент во животот кога знаете дека работата е завршена. Во групацијата „Рено“ се соочивме со огромни предизвици за помалку од пет години! Постигнавме она што многумина го сметаа за невозможно. Денес, резултатите зборуваат сами за себе – тие се најдобрите во историјата на компанијата.“
Фото: Принтскрин
